الإنتحـار فقرا.. قبل الموت جوعا
للمرة الثالثة قرر قاضي المعارضات بمحكمة جنح إمبابة تجديد حبس الأم التي حاولت الإنتحار بإلقاء نفسها ورضيعها في النيل هربا من الفقر 15 يوما أخرى على ذمة التحقيقات لإتهامها بقتل طفلها الرضيع والشروع في الإنتحار. صدر القرار برئاسة هشام عابد رئيس المحكمة, ترجع وقائع القضية التي باشر التحقيقات فيها عمرو الشربيني رئيس نيابة إمبابة عندما ألقت أنوار محمد إبراهيم 35 عاما بنفسها وطفلها .
[ الأهرام ـ الثلاثاء ـ 10 أكتوبر 2006 ـ ص 28 "محافظات" ]
بمنتهى البجاحة, يحرمونها ورضيعها من القوت, ثم يعاقبوها على قرار يائس بالهرب من دنيا لا يحيى فيها سوى الكبار!, من الملوم هنا ياسادة؟ من الملوم يا سيادة رئيس المحكمة؟ من الملوم يا سيادة رئيس النيابة؟ هل أنوار هي من يجب أن يقبع في الحبس؟ هل فيكم من يذكر قول عمر بن الخطاب رضي الله عنه ” والله لو أن بغلة تعثّرت في العراق لخفت أن يسألني الله تعالى عنها لِمَ لم أُسَوِّ لها الطريق “.
قارن بين موقف عمر بن الخطاب من “بغلة” .. ”تعثرت”, وبين موقف دولتنا نحن من “إنسانة” .. ”حاولت الإنتحار فقرا” .
حسبي الله ونعم الوكيل بجد
بيحاكموها بتهمة الشروع في قتل الرضيع؟؟؟؟؟؟؟؟؟ طيب و لو ماكانتش عملت كدا و مات من قلة التغذية كانوا هايحاكموا مين بتهمة قتله؟؟؟؟
حسبي الله ونعم الوكيل ..الناس دول ضميرهم ميت بجد ..
موضوعك مهم يا عم حبيب
بس انا عندي وجهة نظر تانية واكيد انت كنت حاططها في دماغك وانت بتكتب الموضوع
وهى … ان مهما كان الفقر والبؤس اللى هيا بتعاني منه مش من حقها لا انها تنهى حياتها ولا حياة ابنها
معلش متتنرفزش بس فكر بعقلانية وبهدؤ اليست اجسادنا وديعة اودعنا الله اياها
يعني هل من حقنا ان نتصرف في ارواحنا كيفما نشاء
معلش يا اخ محمد مش عشان فقير يبقى اقتل نفسي.. ومتهيألى ان سيدنا عمر ابن الخطاب اما قال (( لو كان الفقر رجلا لقتلته )) اكيد كان قصدة انه يقتل الفقر في صورته المعنوية مش معنى كدة بقى عشان فقير يبقى اروح انتحر
معتقدش يعني ان ده يبقى حل .. ومصيرها كان هيبقى والعياذ بالله النار …الا من رحم ربي
كمان اذا كان ليها الحرية في انها تنهي حياتها يبقى اكيد مش من حقها تنهي حياة رضيعها
الياقوت:
من كتر ما بقينا بنقول الكلمة دي اليومين دول, الواحد حس انه بقى بيتواكل فعلا . الله المستعان.
نورتي المدونة:)
بلو روز:
على رأي جهاد, مش نقص التغذية ده هو بعينه “الموت من الجوع”؟ مين قال ماحدش بيموت من الجوع؟؟
زهرة:
هي المشكلة مش في الضمير, المشكلة في “الكوسة”, شخص نجح في الكلية بواسطة, وطالع من تعليم مهترىء اصلا, واتعين بواسطة, ولاءه هايكون لمين؟ للشعب؟ ولا للي عينه؟؟
بيدو:
ازيك؟:) انا كنت مستني الرد ده على فكرة من بدري D:
بص يا بيدو, ماحدش هنا بيقرها على ما فعلت, كلنا نعرف حرمة الإقدام على الفعل ده, وكون المنتحر يائسا من رحمة الله, بس..
بس متخيل يابيدو انها انتحرت عشان ابنها جعان؟ متخيل شكلها وهي يوم ورا التاني ورا التالت مش لاقيه حاجة تاكلها, تاكلها ايه.. مش لاقية حاجة ابنها ياكلها.. متخيل المنظر؟
انت عارف ان عمر بن الخطاب في وقت المجاعة منع حد قطع اليد ؟ عارف كان بياكل هو نفسه ايه وقتها؟
كل اللي عايز اقوله ان النقطة اللي لازم التركيز يبقى عليها هنا الحالة الصادمة اللي وصلنالها.. أم تنتحر عشان مش لاقية أكل لرضيعها.. وبمنتهى البجاحة, الناس اللي وصلوها للدرجة دي من الفقر, بتوزيعهم الغير عادل للثروة, التوزيع اللي خلّى واحد يعمل فيديو كليب ياخد كام مية ألف, وواحد يعمل مسلسل ولا فيلم ياخد كام مليون, وواحدة زيها ماتلاقيش اللقمة.. اللقمة!! تخيل الناس اللي عملوا كده.. بمنتهى البجاحة كمان يروحوا يحاكموها, يا الله !
[...] منذ الحرب العالمية الثانية لا تزال الألغام التي قامت بزرعها الإنجليز والحلفاء متواجدة بالساحل الشمالي, منذ خمس سنوات قدر بعض الخبراء تكلفة إزالة هذه الألغام بـ250 مليون دولار, لماذا لم تتقدم مصر بطلب في الأمم المتحدة بإزالة هذه الألغام على نفقة الحلفاء؟ أم من المفترض أن يدفع شعب ينتحر جوعا تكلفة إزالة هذه الألغام التي عطلت جزء هام من الساحل الشمالي وأصبح كأن لم يكن موجودا؟! [...]
شكرا تاني مرة على ردك يا محمد وشكرا لعبدالرحمن انو عرفني على مدونتك
انا مش عايزك تعتقد انى عشان بخش على النت يبقى عندي كومبيوتر وان حالتى بقى هاي وكدة … بس الله هو اللى اعلم بحالى وحال ناس كتير زيي
انا مش هقولك ان انا وصلت للدرجة دي بس الحمد لله ابويا الله يرحمه رباني صح وجهزني ليوم زي ده
ومعلش مهما كانت حالتها هيا وابنها اكيد مش هيكون اصعب من صبر الرسول والصحابة اما قريش قاطعتهم
وده كان امتحان من ربنا ليها …وربنا يلطف بينا يارب
كمان انا والله طول عمري اقول ان حسنى مسئول عن الفساد بنسبة 50 % بس والشعب يتحمل الباقى
لان الشعب ببساطة انضحك عليه من الحكومة … الحكومة اللى عرفت ازاي تزرع الخوف في الشعب وعرفت ازاي تخليه يقول حسبي الله ونعم الوكيل عمال على بطال
لغت حاجة اسمها اتحاد طلبة وحاجة اسمها انشطة جامعية وفرضت بالغصب قدوة سيئة للشباب اسمها تامر بيه حسنى
انا عايز اقول كلام كتير بس كفاية بقى لحسن انا عليا كلية بكرة وكالعادة مش هلاقى مواصلات
سلام
اه صحيح كنت عايزك تقول لعبدالرحمن (موشو) انه يحن عليا ويعبرني لحسن اخوك منفضلي خالص وانا حاسس انى تايه في القسم اللى انا فيه ده
سلام لاخر مرة
الواحد مش عارف يقول ايه بس
بجد لنا الله فى هذا البلد الذى انقلبت فيه الموازين
انا شايفه ان الهروب مش حل
لكن مش كلنا عندنا نفس القدره على المقاومه
الذنب ذنب اللى وصلها للمرحلة دى
عندى سؤال مالوش علاقه بالموضوع
انا عاوزه أعرف كل الأخبار السخنه بتاعت المدونين أول بأول.. اعمل ايه؟؟
انا زعلانه على موضوع الفطار اللى ماعرفتهوش الا دلوقتى
أنا مش بحب الانعزال.. ممكن تفيدنى
بيدو: يوصل بإذن الله
ـ
وينكي:
تقدري تشتركي في مجتمع المدونين المصريين http://www.egyblogs.com وهاتوصلك الأخبار دي أول بأول بإذن الله
نوّرتي المدونة
[...] طبعا طبعا, مصر كانت قطعة من أوروبا ولم تتخلف إلا بسبب إرتداء بناتها للحجاب, أكيد طبعا يا فاروق بيه, حجاب البنات ده هو اللي رجعنا ورا فعلا!, لا سرقة وغياب للعدالة في توزيع الأجور ولا غياب للبحث العلمي ولا توريث ولا قانون طوارئ ولا تحرش جنسي في الشوارع ولا ناس بتنتحر فقرا ولا حاجة.. ما يأخرنا عن أوروبا هو الحجاب مفيش غيره! [...]